شکرگڑھ(صہیب حسن صدیقی) رکن قومی اسمبلی و وفاقی پارلیمانی سیکرٹری چوہدری انوار الحق  کی سیکرٹری ہیلتھ نادیہ ثاقب سے ملاقات ۔ ملاقات میں شکرگڑھ اور ظفروال کے سرکاری ہسپتالوں کی صورتحال اور درکار اپ گریڈیشن کے حوالے سے تفصیلی تبادلہ خیال کیا گیا۔ ملاقات میں شکرگڑھ ہسپتال میں کنسلٹنٹس کی خالی آسامیوں کو فوری طور پر پُر کرنے کی سفارش کی گئی تاکہ عوام کو مربوط اور معیاری طبی سہولیات فی الفور فراہم کی جاسکیں۔ وفاقی پارلیمانی سیکرٹری نے سی ای او ڈاکٹر عدنان اور ایم ایس ڈاکٹر ابوذر کی کارکردگی اور مؤثر انتظامی اقدامات کو سراہا اور کہا کہ دونوں افسران کی محنت کی بدولت ہسپتال میں واضح بہتری نظر آرہی ہے۔ مزید برآں ترقیاتی کاموں کے تسلسل کو برقرار رکھنے کے لیے ہسپتال کے بقایا فنڈز فوری طور پر ریلیز کرنے کی سفارش بھی کی۔ انہوں نے توقع ظاہر کی کہ حکومتِ پنجاب عوام کو بہتر صحت سہولیات کی فراہمی کے لیے تمام ضروری اقدامات جاری رکھے گی۔