شکرگڑھ (ایڈیٹر نعیم شیخ) رکن قومی اسمبلی وفاقی پارلیمانی سیکرٹری انوار الحق چودہری نے گزشتہ روز ڈائریکٹر جنرل ٹیکنیکل وزارت ریلوے فرید احمد سے خصوصی ملاقات کی۔ ملاقات میں نارووال شکرگڑھ چک امرو تک عرصہ دراز سے بند ریلوے ٹریک کی مکمل بحالی کے فزیبلٹی پلان پر تفصیلی تبادلہ خیال کیا گیا۔ ڈائریکٹر جنرل ٹیکنیکل وزارت ریلوے فرید احمد نے گفتگو کرتے ہوئے بتایا کہ نارووال شکرگڑھ تا چک امرو ریلوے ٹریک کی بحالی کےلئے ابتدائی تخمینہ تقریباً 11 ارب روپے لگایا گیا ہے۔ اب اس منصوبے کی تکمیل اور کام کے آغاز کے لئے جلد ہی لائحہ عمل تیار کیا جائے گا رکن قومی اسمبلی انوارالحق چودہری نے اپنی گفتگو میں اس عوامی منصوبہ کی تکمیل کے لئے جلد از جلد کام شروع کرنے کی ضرورت پر زور دیا۔ ڈائریکٹر جنرل نے شکرگڑھ کے عوام کے لئے ریلوے بحالی کے اس قیمتی منصوبے کی تکمیل کے لئے اپنے ہر ممکن اور دستیاب وسائل کو بروئے کار لانے کی یقین دہانی کروائی۔